tauba sitam se ki mujhe sina-figar dekh kar

tauba sitam se kī mujhe sīna-figār dekh kar

lo unheñ rahm aa gayā hālat-e-zār dekh kar

fart-e-ḳhushī se tā-sahar ġhuncha-e-dil hañsā kiyā

tere gale meñ shām-e-vasl phūloñ kā haar dekh kar

aur na koī bas chalā aur na kuchh bhī ho sakā

ro.e asīr-e-qaid-e-ġham josh-e-bahār dekh kar

ḳhauf-e-gunah nahīñ rahā dil ko phir aasrā milā

yād-e-karam bhī aa ga.ī roz-e-shumār dekh kar

Thokaroñ se miTā.egā koī agar nishān-e-qabr

ro.egī bekasī mirī kis kā mazār dekh kar

hosh-o-havās par girī barq-e-jamāl-e-dil-faroz

kuchh na rahī hameñ ḳhabar jalva-e-yār dekh kar

chādar-e-ġham paḌī huī sham-e-lahad bujhī huī

ahl-e-jahāñ haiñ chashm-e-nam merā mazār dekh kar

tauba ye koī baat hai apne kiye kī sharm se

un kī balā jhukā.e sar roz-e-shumār dekh kar

maut se yuuñ shab-e-alam ḳhush hue mubtalā-e-ġham

shaad ho jis tarah se yaar sūrat-e-yār dekh kar

tauba sitam se ki mujhe sina-figar dekh kar

lo unhen rahm aa gaya haalat-e-zar dekh kar

fart-e-KHushi se ta-sahar ghuncha-e-dil hansa kiya

tere gale mein sham-e-wasl phulon ka haar dekh kar

aur na koi bas chala aur na kuchh bhi ho saka

roe asir-e-qaid-e-gham josh-e-bahaar dekh kar

KHauf-e-gunah nahin raha dil ko phir aasra mila

yaad-e-karam bhi aa gai roz-e-shumar dekh kar

Thokaron se miTaega koi agar nishan-e-qabr

roegi bekasi meri kis ka mazar dekh kar

hosh-o-hawas par giri barq-e-jamal-e-dil-faroz

kuchh na rahi hamein KHabar jalwa-e-yar dekh kar

chadar-e-gham paDi hui sham-e-lahad bujhi hui

ahl-e-jahan hain chashm-e-nam mera mazar dekh kar

tauba ye koi baat hai apne kiye ki sharm se

un ki bala jhukae sar roz-e-shumar dekh kar

maut se yun shab-e-alam KHush hue mubtala-e-gham

shad ho jis tarah se yar surat-e-yar dekh kar