tauf-e-haram na der ki gahraiyon mein hai

tauf-e-haram na der kī gahrā.iyoñ meñ hai

jo lutf un ke dar kī jabīñ-sā.iyoñ meñ hai

hairat nigāh-e-shauq kī paspā.iyoñ meñ hai

jalva ba-zāt-e-ḳhud hī tamāshā.iyoñ meñ hai

zāhir ye kar rahī haiñ shab-e-ġham kī nuz.hateñ

koī chhupā huā mirī tanhā.iyoñ meñ hai

duniyā-e-rañg-o-bū se guzar kar pata chalā

poshīda koī ruuh kī gahrā.iyoñ meñ hai

paatā huuñ un ko har nafas-e-iztirāb meñ

mauj-e-sakūñ bhī duur kī añgḌā.iyoñ meñ hai

merā junūn-e-shauq hī kyuuñ ho qusūr-vār

shāmil tirī nigāh bhī rusvā.iyoñ meñ hai

ai sham-e-pur-ġhurūr zarā ġhaur se tū dekh

ye kis kī raushnī tirī parchhā.iyoñ meñ hai

is ke liye 'shakīl' ḳhizāñ kyā bahār kyā

Duubā huā jo husn kī ra.anā.iyoñ meñ hai

tauf-e-haram na der ki gahraiyon mein hai

jo lutf un ke dar ki jabin-saiyon mein hai

hairat nigah-e-shauq ki paspaiyon mein hai

jalwa ba-zat-e-KHud hi tamashaiyon mein hai

zahir ye kar rahi hain shab-e-gham ki nuzhaten

koi chhupa hua meri tanhaiyon mein hai

duniya-e-rang-o-bu se guzar kar pata chala

poshida koi ruh ki gahraiyon mein hai

pata hun un ko har nafas-e-iztirab mein

mauj-e-sakun bhi dur ki angDaiyon mein hai

mera junun-e-shauq hi kyun ho qusur-war

shamil teri nigah bhi ruswaiyon mein hai

ai sham-e-pur-ghurur zara ghaur se tu dekh

ye kis ki raushni teri parchhaiyon mein hai

is ke liye 'shakil' KHizan kya bahaar kya

Duba hua jo husn ki ranaiyon mein hai