tauq-e-gardan se na zanjir se ji Darta hai

tauq-e-gardan se na zanjīr se jī Dartā hai

haañ tirī zulf-e-girah-gīr se jī Dartā hai

dil to qaa.el hai tire lutf-o-karam kā lekin

apnī phūTī huī taqdīr se jī Dartā hai

aap kī chup se ulajhtī hai tabī.at aksar

aap kī shoḳhī-e-taqrīr se jī Dartā hai

kahīñ ye bhī na ho manshā-e-mashiyyat ke ḳhilāf

ab to har sa.ī se tadbīr se jī Dartā hai

pahle jo harf ba-sad-shauq zabāñ par aayā

ab usī harf kī tafsīr se jī Dartā hai

muñh se bole na kabhī sar se jo khele na kabhī

tujh se baḌh kar tirī tasvīr se jī Dartā hai

is kā anjām bhī āḳhir kahīñ taḳhrīb na ho

is liye har na.ī ta.amīr se jī Dartā hai

pahle kuchh ḳhvāb the aise ki the dahshat kā sabab

ab to har ḳhvāb kī ta.abīr se jī Dartā hai

umr kī umr gunāhoñ meñ basar kar Daalī

aur ab aap kā ta.azīr se jī Dartā hai

sabr paḌ jaa.e na tujh par kahīñ mazlūmoñ kā

un kī fariyād kī tāsīr se jī Dartā hai

is ke parde meñ baḌī tīrgiyāñ haiñ 'tālib'

is liye kasrat-e-tanvīr se jī Dartā hai

tauq-e-gardan se na zanjir se ji Darta hai

han teri zulf-e-girah-gir se ji Darta hai

dil to qael hai tere lutf-o-karam ka lekin

apni phuTi hui taqdir se ji Darta hai

aap ki chup se ulajhti hai tabiat aksar

aap ki shoKHi-e-taqrir se ji Darta hai

kahin ye bhi na ho mansha-e-mashiyyat ke KHilaf

ab to har sai se tadbir se ji Darta hai

pahle jo harf ba-sad-shauq zaban par aaya

ab usi harf ki tafsir se ji Darta hai

munh se bole na kabhi sar se jo khele na kabhi

tujh se baDh kar teri taswir se ji Darta hai

is ka anjam bhi aaKHir kahin taKHrib na ho

is liye har nai tamir se ji Darta hai

pahle kuchh KHwab the aise ki the dahshat ka sabab

ab to har KHwab ki tabir se ji Darta hai

umr ki umr gunahon mein basar kar Dali

aur ab aap ka tazir se ji Darta hai

sabr paD jae na tujh par kahin mazlumon ka

un ki fariyaad ki tasir se ji Darta hai

is ke parde mein baDi tirgiyan hain 'talib'

is liye kasrat-e-tanwir se ji Darta hai