tauqir andheron ki baDha di gai shayad

tauqīr añdheroñ kī baḌhā dī ga.ī shāyad

ik sham.a jo raushan thī bujhā dī ga.ī shāyad

phir dar-badarī hone lagī us kā muqaddar

phir shauq ke sho.aloñ ko havā dī ga.ī shāyad

mauhūm nazar aatā hai ab josh-e-mulāqāt

kuchh garmi-e-ehsās ghaTā dī ga.ī shāyad

is baar bhī sho.aloñ ne machā Daalī tabāhī

is baar bhī sho.aloñ ko havā dī ga.ī shāyad

Tiktīñ nahīñ duniyā-e-haqīqat pe nigāheñ

ḳhvāboñ kī koī bazm sajā dī ga.ī shāyad

aa Thahrī thī jo zabt ke asrār se bach kar

āñkhoñ se vahī buuñd girā dī ga.ī shāyad

qātil ko biThāyā gayā sar par mire hote

mujh ko merī auqāt batā dī ga.ī shāyad

tauqir andheron ki baDha di gai shayad

ek shama jo raushan thi bujha di gai shayad

phir dar-badari hone lagi us ka muqaddar

phir shauq ke shoalon ko hawa di gai shayad

mauhum nazar aata hai ab josh-e-mulaqat

kuchh garmi-e-ehsas ghaTa di gai shayad

is bar bhi shoalon ne macha Dali tabahi

is bar bhi shoalon ko hawa di gai shayad

Tiktin nahin duniya-e-haqiqat pe nigahen

KHwabon ki koi bazm saja di gai shayad

aa Thahri thi jo zabt ke asrar se bach kar

aankhon se wahi bund gira di gai shayad

qatil ko biThaya gaya sar par mere hote

mujh ko meri auqat bata di gai shayad