tauqir-e-eatibar-e-wafa aur baDh gai

tauqīr-e-e.atibār-e-vafā aur baḌh ga.ī

lutf-o-karam ke saath sazā aur baḌh ga.ī

dil be-niyāz-e-chāra-e-āzār ho gayā

kuchh ārzū-e-teġh-e-jafā aur baḌh ga.ī

jab bhī hue haiñ jāda-o-manzil ke tazkire

dīvāngī-e-ahl-e-vafā aur baḌh ga.ī

ye iltifāt-e-nāz bahut ḳhuub hai magar

dil kah rahā hai terī jafā aur baḌh ga.ī

dekhā hai bār-bār ki fasl-e-bahār meñ

vīrānī-e-chaman kī fazā aur baḌh ga.ī

ai intizār-e-sub.h-e-tarab terī aabrū

ġham ke tufail nām-e-ḳhudā aur baḌh ga.ī

mahbūb sā ḳhayāl kisī kā jab aa gayā

ummīd ke ufuq kī ziyā aur baḌh ga.ī

aksar tirī ināyat-e-paiham ke bāvajūd

mahsūs ye huā ki jafā aur baḌh ga.ī

'azmat' kisī ke dard kā aaya hai jab payām

kuchh raushnī-e-fikr-e-rasā aur baḌh ga.ī

tauqir-e-eatibar-e-wafa aur baDh gai

lutf-o-karam ke sath saza aur baDh gai

dil be-niyaz-e-chaara-e-azar ho gaya

kuchh aarzu-e-tegh-e-jafa aur baDh gai

jab bhi hue hain jada-o-manzil ke tazkire

diwangi-e-ahl-e-wafa aur baDh gai

ye iltifat-e-naz bahut KHub hai magar

dil kah raha hai teri jafa aur baDh gai

dekha hai bar-bar ki fasl-e-bahaar mein

virani-e-chaman ki faza aur baDh gai

ai intizar-e-subh-e-tarab teri aabru

gham ke tufail nam-e-KHuda aur baDh gai

mahbub sa KHayal kisi ka jab aa gaya

ummid ke ufuq ki ziya aur baDh gai

aksar teri inayat-e-paiham ke bawajud

mahsus ye hua ki jafa aur baDh gai

'azmat' kisi ke dard ka aaya hai jab payam

kuchh raushni-e-fikr-e-rasa aur baDh gai