tausan-e-waqt ki raftar baDha di jae

tausan-e-vaqt kī raftār baḌhā dī jaa.e

muddat-e-hijr kisī taur ghaTā dī jaa.e

un se milne pe hai qadġhan magar itnā to ho

roz un kī na.ī tasvīr dikhā dī jaa.e

koī sarhad na ho viize kī zarūrat na rahe

kaash duniyā mire ḳhvāboñ sī banā dī jaa.e

shāyad is tarah judā.ī kī aziyyat kam ho

arsa-e-vasl kī har yaad miTā dī jaa.e

lamha-bhar fasl bhī ḳhatra hai ta'alluq ke liye

jūñhī dīvār uThe ghar meñ girā dī jaa.e

isī duniyā meñ uThā.ī hai sa.ūbat 'kāshif'

isī duniyā meñ mohabbat kī jazā dī jaa.e

tausan-e-waqt ki raftar baDha di jae

muddat-e-hijr kisi taur ghaTa di jae

un se milne pe hai qadghan magar itna to ho

roz un ki nai taswir dikha di jae

koi sarhad na ho wize ki zarurat na rahe

kash duniya mere KHwabon si bana di jae

shayad is tarah judai ki aziyyat kam ho

arsa-e-wasl ki har yaad miTa di jae

lamha-bhar fasl bhi KHatra hai ta'alluq ke liye

junhi diwar uThe ghar mein gira di jae

isi duniya mein uThai hai saubat 'kashif'

isi duniya mein mohabbat ki jaza di jae