tawajjoh apne dil ki sari chahat usko de dungi

tavajjoh apne dil kī saarī chāhat us ko de dūñgī

vo mujh se milne aa.e to rifāqat us ko de dūñgī

nahīñ rakkhūñgī apne paas ḳhvāboñ kā koī gulshan

diloñ meñ khilte phūloñ kī latāfat us ko de dūñgī

maiñ apne paas rakkhūñgī faqat tanhā.ī ke mausam

aur apne dil kī har mahfil kī zīnat us ko de dūñgī

maiñ us ke vasl kī ḳhātir zamāne kī nigāhoñ se

adāvat maañg lūñgī aur mohabbat us ko de dūñgī

maiñ us ke ḳhvāb dekhūñgī to dekhūñgī har ik shab ko

phir ik ik ḳhvāb kī zinda haqīqat us ko de dūñgī

milegā ab jo vo mujh se to sochā hai ki ye 'shāzī'

maiñ apnī zindagī aur apnī qismat us ko de dūñgī

tawajjoh apne dil ki sari chahat us ko de dungi

wo mujh se milne aae to rifaqat us ko de dungi

nahin rakkhungi apne pas KHwabon ka koi gulshan

dilon mein khilte phulon ki latafat us ko de dungi

main apne pas rakkhungi faqat tanhai ke mausam

aur apne dil ki har mahfil ki zinat us ko de dungi

main us ke wasl ki KHatir zamane ki nigahon se

adawat mang lungi aur mohabbat us ko de dungi

main us ke KHwab dekhungi to dekhungi har ek shab ko

phir ek ek KHwab ki zinda haqiqat us ko de dungi

milega ab jo wo mujh se to socha hai ki ye 'shazi'

main apni zindagi aur apni qismat us ko de dungi