tawajjoh is qadar unki use main dil-lagi samjhun

tavajjoh is qadar un kī use maiñ dil-lagī samjhūñ

ki un kī mehrbānī apnī maiñ ḳhush-qismatī samjhūñ

nazar aatā hai dariyā bhī bayābāñ hijr meñ un ke

jo un kā qurb hāsil ho to sahrā ko nadī samjhūñ

bichhaḌ kar un se jiine kī faqat rasmeñ nibhātī huuñ

jo un ke saath guzrī hai usī ko zindagī samjhūñ

fusūñ hai pyaar kā un ke jo kāñTe phuul lagte haiñ

shab-e-dījūr kī bas maiñ hī husn-o-dilkashī samjhūñ

vo merī āñkhoñ ke paiġhām ko kyoñ paḌh nahīñ paate

bhalā kab tak maiñ un kī be-ruḳhī ko sādgī samjhūñ

rakhūñ sar us ke siine par aur apne ġham bhulā Dālūñ

vo dil kā āshnā hai kyoñ use maiñ ajnabī samjhūñ

na maiñ husn-e-mujassam huuñ na mujh meñ koī ḳhūbī hai

magar un kī nazar se ḳhud ko dekhūñ to parī samjhūñ

ghirī huuñ saḳht mushkil meñ magar huuñ mutma.in 'azkā'

ḳhudā kī maslahat hogī koī is meñ yahī samjhūñ

tawajjoh is qadar un ki use main dil-lagi samjhun

ki un ki mehrbani apni main KHush-qismati samjhun

nazar aata hai dariya bhi bayaban hijr mein un ke

jo un ka qurb hasil ho to sahra ko nadi samjhun

bichhaD kar un se jine ki faqat rasmen nibhati hun

jo un ke sath guzri hai usi ko zindagi samjhun

fusun hai pyar ka un ke jo kanTe phul lagte hain

shab-e-dijur ki bas main hi husn-o-dilkashi samjhun

wo meri aankhon ke paigham ko kyon paDh nahin pate

bhala kab tak main un ki be-ruKHi ko sadgi samjhun

rakhun sar us ke sine par aur apne gham bhula Dalun

wo dil ka aashna hai kyon use main ajnabi samjhun

na main husn-e-mujassam hun na mujh mein koi KHubi hai

magar un ki nazar se KHud ko dekhun to pari samjhun

ghiri hun saKHt mushkil mein magar hun mutmain 'azka'

KHuda ki maslahat hogi koi is mein yahi samjhun