tawil soch hai aur muKHtasar lahu mera

tavīl soch hai aur muḳhtasar lahū merā

garāñ safar meñ hai zād-e-safar lahū merā

vo raunaqeñ bhī ga.iiñ us ke ḳhushk hote hī

sajātā rahtā thā dīvār-o-dar lahū merā

har ek lamha mujhe zindagī ne qatl kiyā

tamām umr rahā mere sar lahū merā

dayār-e-ġhair ko mahkā gayā hinā ban kar

ye vāqi.a hai rahā be-hunar lahū merā

vo ruuh thī jise ahd-e-vafā kā paas na thā

kabhī na chhoḌ sakā apnā ghar lahū merā

ujaal deñge añdheroñ kī ye jabīñ ik din

bikhertā hai kuchh aise sharar lahū merā

ravāñ hai qāfila-e-fikr sū-e-dasht-e-junūñ

dikhā rahā hai use rahguzar lahū merā

ravānī likhtī rahī jin kā naam aaTh pahar

vahīñ bahāyā gayā ḳhaak par lahū merā

na jaane kaun sī rut aa ga.ī 'umīd' ab ke

chhupā na paa.ī mirī chashm-e-tar lahū merā

tawil soch hai aur muKHtasar lahu mera

garan safar mein hai zad-e-safar lahu mera

wo raunaqen bhi gain us ke KHushk hote hi

sajata rahta tha diwar-o-dar lahu mera

har ek lamha mujhe zindagi ne qatl kiya

tamam umr raha mere sar lahu mera

dayar-e-ghair ko mahka gaya hina ban kar

ye waqia hai raha be-hunar lahu mera

wo ruh thi jise ahd-e-wafa ka pas na tha

kabhi na chhoD saka apna ghar lahu mera

ujal denge andheron ki ye jabin ek din

bikherta hai kuchh aise sharar lahu mera

rawan hai qafila-e-fikr su-e-dasht-e-junun

dikha raha hai use rahguzar lahu mera

rawani likhti rahi jin ka nam aaTh pahar

wahin bahaya gaya KHak par lahu mera

na jaane kaun si rut aa gai 'umid' ab ke

chhupa na pai meri chashm-e-tar lahu mera