tera chehra jo mere dil mein utar aaya hai

terā chehra jo mere dil meñ utar aayā hai

har bashar sañg liye mujh ko nazar aayā hai

kitnī maġhrūr thī ye raat abhī tak lekin

ek nanhā sā diyā le ke sahar aayā hai

jis ko paalā thā mohabbat se hamesha maiñ ne

āstīnoñ meñ vo chhup kar mere ghar aayā hai

bad-duā.eñ to ġharīboñ kī nahīñ haiñ tujh par

tū jo shohrat kī bulandī se utar aayā hai

manzil-e-ishq ko āsān samajhne vāloñ

kitne sahrāoñ se guzrā huuñ to ghar aayā hai

ye chaman yuuñ hī to sarsabz nahīñ hai 'maz.har'

ham ne sīñchā hai lahū se to samar aayā hai

tera chehra jo mere dil mein utar aaya hai

har bashar sang liye mujh ko nazar aaya hai

kitni maghrur thi ye raat abhi tak lekin

ek nanha sa diya le ke sahar aaya hai

jis ko pala tha mohabbat se hamesha main ne

aastinon mein wo chhup kar mere ghar aaya hai

bad-duaen to gharibon ki nahin hain tujh par

tu jo shohrat ki bulandi se utar aaya hai

manzil-e-ishq ko aasan samajhne walon

kitne sahraon se guzra hun to ghar aaya hai

ye chaman yun hi to sarsabz nahin hai 'mazhar'

hum ne sincha hai lahu se to samar aaya hai