tera husn-o-jamal likhta hun

terā husn-o-jamāl likhtā huuñ

'ishq kā 'arz-e-hāl likhtā huuñ

merā apnā nahīñ hai kuchh bhī yahāñ

maiñ kisī ke ḳhayāl likhtā huuñ

maut ko apnī taaq par rakh kar

ḳhud maiñ apnī majāl likhtā huuñ

us qayāmat se fursateñ le kar

is qayāmat kā haal likhtā huuñ

ḳhush-ḳhirāmī se muñh chhupā kar maiñ

dard-o-zār-o-vabāl likhtā huuñ

raushnā.ī hai raushnī mujh ko

surḳh rang-e-gulāl likhtā huuñ

vo hai ik but ḳhamosh rahtā hai

maiñ huuñ saa.il savāl likhtā huuñ

ek puurī ġhazal likhī lekin

ik adhūrā malāl likhtā huuñ

yuuñ to likhtā nahīñ huuñ maiñ aksar

likh diyā to kamāl likhtā huuñ

log sunte nahīñ haiñ jab mujh ko

tab maiñ jā kar 'ḳhayāl' likhtā huuñ

tera husn-o-jamal likhta hun

'ishq ka 'arz-e-haal likhta hun

mera apna nahin hai kuchh bhi yahan

main kisi ke KHayal likhta hun

maut ko apni taq par rakh kar

KHud main apni majal likhta hun

us qayamat se fursaten le kar

is qayamat ka haal likhta hun

KHush-KHirami se munh chhupa kar main

dard-o-zar-o-wabaal likhta hun

raushnai hai raushni mujh ko

surKH rang-e-gulal likhta hun

wo hai ek but KHamosh rahta hai

main hun sail sawal likhta hun

ek puri ghazal likhi lekin

ek adhura malal likhta hun

yun to likhta nahin hun main aksar

likh diya to kamal likhta hun

log sunte nahin hain jab mujh ko

tab main ja kar 'KHayal' likhta hun