tere diwane ko is tarh sataya gaya hai

tere dīvāne ko is tarh satāyā gayā hai

terī āvāz meñ ab us ko bulāyā gayā hai

merī tasvīr ko dekhā to kahā logoñ ne

yaar is ko to zabardastī hañsāyā gayā hai

kun kī māchis se jalāyā gayā thā ek diyā

vo diyā toḌ ke sūraj ko banāyā gayā hai

hākim-e-vaqt kī ye baat maiñ samjhā hī nahīñ

ā.ina-ḳhāne meñ kyoñ andhoñ ko laayā gayā hai

dil-mohalle meñ mujhe 'ishq kī dā'vat meñ miyāñ

ġham khilāyā gayā hai ashk pilāyā gayā hai

ab to mafhūm churā kar hī ġhazal kī ga.ī hai

yā'nī paanī meñ bahut duudh milāyā gayā hai

dekh dushman ne batāyā hai to sach hogā 'bilāl'

mere baare meñ tujhe jo bhī batāyā gayā hai

tere diwane ko is tarh sataya gaya hai

teri aawaz mein ab us ko bulaya gaya hai

meri taswir ko dekha to kaha logon ne

yar is ko to zabardasti hansaya gaya hai

kun ki machis se jalaya gaya tha ek diya

wo diya toD ke suraj ko banaya gaya hai

hakim-e-waqt ki ye baat main samjha hi nahin

aaina-KHane mein kyon andhon ko laya gaya hai

dil-mohalle mein mujhe 'ishq ki da'wat mein miyan

gham khilaya gaya hai ashk pilaya gaya hai

ab to mafhum chura kar hi ghazal ki gai hai

ya'ni pani mein bahut dudh milaya gaya hai

dekh dushman ne bataya hai to sach hoga 'bilal'

mere bare mein tujhe jo bhi bataya gaya hai