tere hone ka yun iqrar kiya hai maine

tere hone kā yuuñ iqrār kiyā hai maiñ ne

chaḌhte sūraj ko namaskār kiyā hai maiñ ne

pattharoñ meñ thī maiñ patthar to baḌī 'izzat se

ḳhud meñ paidā ye qalam-kār kiyā hai maiñ ne

is ḳharābe meñ mirī hausla-mandī dekho

aa.ina aa.ina kirdār kiyā hai maiñ ne

kaun samjhegā bhalā mere ġhamoñ kī lazzat

ai ġhazal tujh ko hī ġham-ḳhvār kiyā hai maiñ ne

us ne sochā ki vo daulat se mujhe pā legā

merī jur.at thī ki inkār kiyā hai maiñ ne

aañkh bhar kar use jab dekh na maiñ paa.ī to

band āñkhoñ se hī dīdār kiyā hai maiñ ne

ye haqīqat nahīñ afsāna hai ai dīda-e-tar

yuuñ bhī manzar pas-e-dīvār kiyā hai maiñ ne

ruuh khiñchtī hai shab-o-roz ragoñ se merī

us pe ilzām ki bīmār kiyā hai maiñ ne

tere hone ka yun iqrar kiya hai main ne

chaDhte suraj ko namaskar kiya hai main ne

pattharon mein thi main patthar to baDi 'izzat se

KHud mein paida ye qalam-kar kiya hai main ne

is KHarabe mein meri hausla-mandi dekho

aaina aaina kirdar kiya hai main ne

kaun samjhega bhala mere ghamon ki lazzat

ai ghazal tujh ko hi gham-KHwar kiya hai main ne

us ne socha ki wo daulat se mujhe pa lega

meri jurat thi ki inkar kiya hai main ne

aankh bhar kar use jab dekh na main pai to

band aankhon se hi didar kiya hai main ne

ye haqiqat nahin afsana hai ai dida-e-tar

yun bhi manzar pas-e-diwar kiya hai main ne

ruh khinchti hai shab-o-roz ragon se meri

us pe ilzam ki bimar kiya hai main ne