tere KHayal ki KHushbu se hum dil mahkae phirte hain

tere ḳhayāl kī ḳhushbū se ham dil mahkā.e phirte haiñ

ham dīvāne yādoñ kī bārāt sajā.e phirte haiñ

kis ne dekhā kis ne pūchhā aa kar haal faqīroñ kā

kal tak aañkh milāne vaale aañkh churā.e phirte haiñ

vaqt kā dhārā vaqt kā tūfāñ maiñ ne dekhā tū bhī dekh

kal ke raaja rank bane jholī phailā.e phirte haiñ

kapTī dil ne duniyā-bhar meñ chhal kī aag lagā.ī hai

hirs ke bande ḳhvāboñ ke bāzār sajā.e phirte haiñ

ek se aañsū ek sī aa.heñ kaun hai raaja kaun faqīr

ham to apne dil ko ab tak ye samjhā.e phirte haiñ

ġham kī bhiik mile to kaise ġham haiñ kam ġham-ḳhvār bahut

ik muddat se baat ye apne dil meñ chhupā.e phirte haiñ

aah laboñ par ashk āñkhoñ meñ ye apnā sarmāya hai

roz-e-azal se ham to use siine se lagā.e phirte haiñ

tere KHayal ki KHushbu se hum dil mahkae phirte hain

hum diwane yaadon ki baraat sajae phirte hain

kis ne dekha kis ne puchha aa kar haal faqiron ka

kal tak aankh milane wale aankh churae phirte hain

waqt ka dhaara waqt ka tufan main ne dekha tu bhi dekh

kal ke raja rank bane jholi phailae phirte hain

kapTi dil ne duniya-bhar mein chhal ki aag lagai hai

hirs ke bande KHwabon ke bazar sajae phirte hain

ek se aansu ek si aahen kaun hai raja kaun faqir

hum to apne dil ko ab tak ye samjhae phirte hain

gham ki bhik mile to kaise gham hain kam gham-KHwar bahut

ek muddat se baat ye apne dil mein chhupae phirte hain

aah labon par ashk aankhon mein ye apna sarmaya hai

roz-e-azal se hum to use sine se lagae phirte hain