tere kuche se na ye sheftagan jate hain

tere kūche se na ye sheftagāñ jaate haiñ

jhuuT kahte haiñ ki jaate haiñ kahāñ jaate haiñ

āmad-o-raft na pūchh apnī galī kī ham se

aate haiñ hañste hue karte fuġhāñ jaate haiñ

ka.aba o dair meñ dekhe haiñ usī kā jalva

kufr o islām meñ kab dīda-varāñ jaate haiñ

nahīñ maqdūr ki pahuñche koī us tak par ham

juuñ nigah dīda-e-mardum se nihāñ jaate haiñ

gar hai dīdār-talab saaf kar apne dil ko

rū-ba-rū us ke to ā.īna-dilāñ jaate haiñ

jazb terā hī agar khīñche to pahuñcheñ varna

tujh ko sunte haiñ pare vaañ se jahāñ jaate haiñ

aah kartā hai ḳharāsh un kā diloñ meñ naala

kaun ye qāfile meñ nāla-zanāñ jaate haiñ

jī meñ hai kahiye ġhazal aur muqābil us ke

guhar is bahar meñ mazmūñ ke ravāñ jaate haiñ

tujh ko 'bedār' rakhā pīchhe girāñ-bārī ne

rāh-rau jo haiñ subuksār davāñ jaate haiñ

tere kuche se na ye sheftagan jate hain

jhuT kahte hain ki jate hain kahan jate hain

aamad-o-raft na puchh apni gali ki hum se

aate hain hanste hue karte fughan jate hain

kaba o dair mein dekhe hain usi ka jalwa

kufr o islam mein kab dida-waran jate hain

nahin maqdur ki pahunche koi us tak par hum

jun nigah dida-e-mardum se nihan jate hain

gar hai didar-talab saf kar apne dil ko

ru-ba-ru us ke to aaina-dilan jate hain

jazb tera hi agar khinche to pahunchen warna

tujh ko sunte hain pare wan se jahan jate hain

aah karta hai KHarash un ka dilon mein nala

kaun ye qafile mein nala-zanan jate hain

ji mein hai kahiye ghazal aur muqabil us ke

guhar is bahar mein mazmun ke rawan jate hain

tujh ko 'bedar' rakha pichhe giran-bari ne

rah-rau jo hain subuksar dawan jate hain