tere kya apne bhi kuchh kaam na aae hum log

tere kyā apne bhī kuchh kaam na aa.e ham log

kuchh na kuchh tū ne banānā thā banā.e ham log

kohsāroñ pe qadam rakh ke ye phal toḌā hai

ijz miTTī se uThā kar nahīñ laa.e ham log

phir palaT ā.eñge tasbīh ke dānoñ kī tarah

dast-e-duniyā tirī poroñ se girā.e ham log

khīñch kar laa.e haiñ dar se tire mujrim kī tarah

dil ko bātoñ meñ lagā kar nahīñ laa.e ham log

bā.is-e-sharm hai ai dost numūd-e-girya

poñchh kar ashk tire ḳhvāb meñ aa.e ham log

tere kya apne bhi kuchh kaam na aae hum log

kuchh na kuchh tu ne banana tha banae hum log

kohsaron pe qadam rakh ke ye phal toDa hai

ijz miTTi se uTha kar nahin lae hum log

phir palaT aaenge tasbih ke danon ki tarah

dast-e-duniya teri poron se girae hum log

khinch kar lae hain dar se tere mujrim ki tarah

dil ko baaton mein laga kar nahin lae hum log

bais-e-sharm hai ai dost numud-e-girya

ponchh kar ashk tere KHwab mein aae hum log