tere maiKHane ka ye bhi ajab dastur hai saqi

tere maiḳhāne kā ye bhī ajab dastūr hai saaqī

koī tishna-dahan mastī meñ koī chuur hai saaqī

diloñ ke rabt-e-paiham ko ḳhudā qaa.em rakhe hamdam

na maiñ huuñ duur saaqī se na mujh se duur hai saaqī

bahal jaa.e jahāñ dil hai vahī jannat haqīqat meñ

jo dil insān kā le le vo insāñ huur hai saaqī

na le muḳhtāriyoñ se kaam tū us ke muqābil meñ

tere mai-kash ke siine meñ dil-e-majbūr hai saaqī

mirī ḳhuddāriyāñ bad-kaifiyoñ se dab nahīñ saktīñ

agarche shīsha-e-dil apnā chaknā-chūr hai saaqī

tirī jaadū bharī āñkhoñ ne aisī mai pilā.ī hai

hamārī zindagī kī zindagī maḳhmūr hai saaqī

Thikāna hī nahīñ koī mire armān-e-mastī kā

na ye mahdūd hai saaqī na vo mahsūr hai saaqī

jahāñ hājat na mai kī hai na shīshe kī na sāġhar kī

abhī vo manzil-e-hastī nihāyat duur hai saaqī

ināyat se pilā de rind-e-ḳhud-atvār 'akmal' ko

tirī dariyā-dilī kaunain meñ mash.hūr hai saaqī

tere maiKHane ka ye bhi ajab dastur hai saqi

koi tishna-dahan masti mein koi chur hai saqi

dilon ke rabt-e-paiham ko KHuda qaem rakhe hamdam

na main hun dur saqi se na mujh se dur hai saqi

bahal jae jahan dil hai wahi jannat haqiqat mein

jo dil insan ka le le wo insan hur hai saqi

na le muKHtariyon se kaam tu us ke muqabil mein

tere mai-kash ke sine mein dil-e-majbur hai saqi

meri KHuddariyan bad-kaifiyon se dab nahin saktin

agarche shisha-e-dil apna chakna-chur hai saqi

teri jadu bhari aankhon ne aisi mai pilai hai

hamari zindagi ki zindagi maKHmur hai saqi

Thikana hi nahin koi mere arman-e-masti ka

na ye mahdud hai saqi na wo mahsur hai saqi

jahan hajat na mai ki hai na shishe ki na saghar ki

abhi wo manzil-e-hasti nihayat dur hai saqi

inayat se pila de rind-e-KHud-atwar 'akmal' ko

teri dariya-dili kaunain mein mashhur hai saqi