tere majnun ko aabaadi se virane se kya matlab

tere majnūñ ko ābādī se vīrāne se kyā matlab

tire jalvoñ se matlab ā.ina-ḳhāne se kyā matlab

ilāhī ishq ke bandoñ ko tarsāne se kyā matlab

hayāt-e-jāvidāñ baḳhshī to mar jaane se kyā matlab

tirī ulfat ke behoshoñ ko hosh aane se kyā matlab

tire dīdār ke mastoñ ko maiḳhāne se kyā matlab

jab aa.e zab.h karne phir taras khāne se kyā matlab

gale par jab rakhā ḳhanjar to ruk jaane se kyā matlab

paḌā rahne do be-gor-o-kafan qātil ke kūche meñ

shahīdoñ kī haiñ lāsheñ un ko dafnāne se kyā matlab

ḳhushī se de diyā jab dil to phir is kā hai kyā shikva

magar ye pūchhtā huuñ dil churā laane se kyā matlab

taḌapte rahte haiñ din-rāt zikr-o-fikr-e-ulfat meñ

tirī ḳhvāhish meñ dīvānoñ ko so jaane se kyā matlab

maraz baḌhtā hai furqat meñ ilāj-o-fikr-e-darmāñ se

jo bīmār-e-mohabbat haiñ davā khāne se kyā matlab

zamāna jāntā hai ishq meñ jo kuchh musībat hai

phir ifshā raaz kar ke dam nikal jaane se kyā matlab

urūj-e-bā-kamālī hai zavāl-e-be-kamālī hai

shahīd-e-nāz kī mayyat ko dafnāne se kyā matlab

jahāñ bhī tū nazar aaya vahīñ sajda kiyā fauran

tire tālib ko ka.abe aur but-ḳhāne se kyā matlab

tire jalve nazar aate haiñ jab duniyā-e-fānī meñ

tire shaidā ko duniyā chhoḌ ke jaane se kyā matlab

'umar' har-vaqt un se vasl rahtā hai ḳhayāloñ meñ

unheñ aane se kyā matlab hameñ jaane se kyā matlab

tere majnun ko aabaadi se virane se kya matlab

tere jalwon se matlab aaina-KHane se kya matlab

ilahi ishq ke bandon ko tarsane se kya matlab

hayat-e-jawidan baKHshi to mar jaane se kya matlab

teri ulfat ke behoshon ko hosh aane se kya matlab

tere didar ke maston ko maiKHane se kya matlab

jab aae zabh karne phir taras khane se kya matlab

gale par jab rakha KHanjar to ruk jaane se kya matlab

paDa rahne do be-gor-o-kafan qatil ke kuche mein

shahidon ki hain lashen un ko dafnane se kya matlab

KHushi se de diya jab dil to phir is ka hai kya shikwa

magar ye puchhta hun dil chura lane se kya matlab

taDapte rahte hain din-raat zikr-o-fikr-e-ulfat mein

teri KHwahish mein diwanon ko so jaane se kya matlab

maraz baDhta hai furqat mein ilaj-o-fikr-e-darman se

jo bimar-e-mohabbat hain dawa khane se kya matlab

zamana jaanta hai ishq mein jo kuchh musibat hai

phir ifsha raaz kar ke dam nikal jaane se kya matlab

uruj-e-ba-kamali hai zawal-e-be-kamali hai

shahid-e-naz ki mayyat ko dafnane se kya matlab

jahan bhi tu nazar aaya wahin sajda kiya fauran

tere talib ko kabe aur but-KHane se kya matlab

tere jalwe nazar aate hain jab duniya-e-fani mein

tere shaida ko duniya chhoD ke jaane se kya matlab

'umar' har-waqt un se wasl rahta hai KHayalon mein

unhen aane se kya matlab hamein jaane se kya matlab