tere paikar si koi murat bana li jaegi

tere paikar sī koī mūrat banā lī jā.egī

dil ke bahlāne kī ye sūrat nikālī jā.egī

kaun kah saktā thā ye qaus-e-quzah ko dekh kar

ek hī āñchal meñ ye rangat samā lī jā.egī

kāġhzī phūloñ se jab mānūs hoñgī titliyāñ

āshiqī kī rasm duniyā se uThā lī jā.egī

aa.ine meñ baal paḌ jaa.e to jā saktā nahīñ

ret kī dīvār to phir se banā lī jā.egī

ham jo kār-e-āzarī meñ be-hunar Thahre to kyā

un kī sūrat sher ke qālib meñ Dhālī jā.egī

ḳhud-parastī ke nashe meñ jin ko hai zo.am-e-jamāl

aa.ina dekheñ to un kī ḳhush-ḳhayālī jā.egī

ishq kī fitrat meñ hai parvān hī chaḌhnā 'ra.īs'

husn vo daulat nahīñ jo phir kamā lī jā.egī

tere paikar si koi murat bana li jaegi

dil ke bahlane ki ye surat nikali jaegi

kaun kah sakta tha ye qaus-e-quzah ko dekh kar

ek hi aanchal mein ye rangat sama li jaegi

kaghzi phulon se jab manus hongi titliyan

aashiqi ki rasm duniya se uTha li jaegi

aaine mein baal paD jae to ja sakta nahin

ret ki diwar to phir se bana li jaegi

hum jo kar-e-azari mein be-hunar Thahre to kya

un ki surat sher ke qalib mein Dhaali jaegi

KHud-parasti ke nashe mein jin ko hai zoam-e-jamal

aaina dekhen to un ki KHush-KHayali jaegi

ishq ki fitrat mein hai parwan hi chaDhna 'rais'

husn wo daulat nahin jo phir kama li jaegi