teri bazm-e-tarab ki sarKHushi kuchh aur kahti hai

terī bazm-e-tarab kī sarḳhushī kuchh aur kahtī hai

mire māhaul kī sanjīdgī kuchh aur kahtī hai

fazā-e-shām-e-mai-ḳhāna abhī kuchh aur kahtī hai

hamārī shiddat-e-tishna-labī kuchh aur kahtī hai

farozāñ to hai bām-e-zindagī fan ke charāġhoñ se

magar ahd-e-hunar kī raushnī kuchh aur kahtī hai

tumhārī chāk-dāmānī ba-fasl-e-gul bajā yaaro

mazāq-e-ishq kī shā.istagī kuchh aur kahtī hai

taqāzā hai tumhārī ḳhastagī kā tum Thahar jaao

hamārī ābla-pā.ī abhī kuchh aur kahtī hai

lahū rote hue go umr guzrī hai mohabbat meñ

magar qisse kī rañgīnī abhī kuchh aur kahtī hai

adā-e-shoḳh jin āñkhoñ meñ hotī thī takallum kī

ab un āñkhoñ kī gahrī ḳhāmushī kuchh aur kahtī hai

bajā hai parda-dārī-e-shikast-e-ārzū 'nāzim'

tire lab kī magar phīkī hañsī kuchh aur kahtī hai

teri bazm-e-tarab ki sarKHushi kuchh aur kahti hai

mere mahaul ki sanjidgi kuchh aur kahti hai

faza-e-sham-e-mai-KHana abhi kuchh aur kahti hai

hamari shiddat-e-tishna-labi kuchh aur kahti hai

farozan to hai baam-e-zindagi fan ke charaghon se

magar ahd-e-hunar ki raushni kuchh aur kahti hai

tumhaari chaak-damani ba-fasl-e-gul baja yaro

mazaq-e-ishq ki shaistagi kuchh aur kahti hai

taqaza hai tumhaari KHastagi ka tum Thahar jao

hamari aabla-pai abhi kuchh aur kahti hai

lahu rote hue go umr guzri hai mohabbat mein

magar qisse ki rangini abhi kuchh aur kahti hai

ada-e-shoKH jin aankhon mein hoti thi takallum ki

ab un aankhon ki gahri KHamushi kuchh aur kahti hai

baja hai parda-dari-e-shikast-e-arzu 'nazim'

tere lab ki magar phiki hansi kuchh aur kahti hai