teri chahat mein kami kaise gawara kar len

terī chāhat meñ kamī kaise gavārā kar leñ

ishq rozī to nahīñ hai ki guzārā kar leñ

manfa.at chāhe to ulfat ko tijārat na banā

jānte būjhte ham kaise ḳhasārā kar leñ

tū havāoñ ke jhapTTe meñ na aayā ho kahīñ

do ghaḌī Thahar jā terā bhī utārā kar leñ

tere va.adoñ pe yaqīñ ho to usī aas se ham

jism ko raakh kareñ ruuh ko paara kar leñ

ġhair se bhī vo muḳhātab haiñ to ummīd sī hai

baat ham se na sahī zikr hamārā kar leñ

kaise bardāsht kareñ ġhair kī tujh par tanqīd

ḳhud bhī shākī hoñ to ḳhud se bhī kinārā kar leñ

ham se ġhāfil nahīñ rahte kabhī tūfāñ ki kahīñ

Dūbte Dūbte tinke ko sahārā kar leñ

huī matrūk-e-vafā aam huī bul-havasī

aql kahtī hai ki ham bhī koī chāra kar leñ

teri chahat mein kami kaise gawara kar len

ishq rozi to nahin hai ki guzara kar len

manfat chahe to ulfat ko tijarat na bana

jaante bujhte hum kaise KHasara kar len

tu hawaon ke jhapTTe mein na aaya ho kahin

do ghaDi Thahar ja tera bhi utara kar len

tere wadon pe yaqin ho to usi aas se hum

jism ko rakh karen ruh ko para kar len

ghair se bhi wo muKHatab hain to ummid si hai

baat hum se na sahi zikr hamara kar len

kaise bardasht karen ghair ki tujh par tanqid

KHud bhi shaki hon to KHud se bhi kinara kar len

hum se ghafil nahin rahte kabhi tufan ki kahin

Dubte Dubte tinke ko sahaara kar len

hui matruk-e-wafa aam hui bul-hawasi

aql kahti hai ki hum bhi koi chaara kar len