teri dahliz par isko muqaddas moatabar jaana

terī dahlīz par is ko muqaddas mo'atabar jaanā

magar jab aa.e maidāñ meñ to kab phir sar ko sar jaanā

yahī andāz to ahsan ko asfal karne vaalā hai

faqat khānā kamānā aish karnā aur mar jaanā

haqīqī ishq thā jis ne rakhā tārīḳh meñ zinda

kisī kā do pahāḌoñ par idhar jaanā udhar jaanā

tumhārī muntazir rahtī haiñ būḌhī shāḳheñ shiddat se

parinde der se mat shaam ko sū-e-shajar jaanā

mohabbat karne vāloñ ke bhī kyā andāz hote haiñ

kabhī āñdhī se laḌ jaanā kabhī aahaT se Dar jaanā

vahāñ bachchoñ ke chehre dekh kar kuchh yaad aa.egā

hamāre ghar jalā kar tum ko bhī hai apne ghar jaanā

paḌho pahle 'nabīl' ik umr phir thāmo qalam apnā

zarūrī hai chhalakne ke liye andar se bhar jaanā

teri dahliz par is ko muqaddas mo'atabar jaana

magar jab aae maidan mein to kab phir sar ko sar jaana

yahi andaz to ahsan ko asfal karne wala hai

faqat khana kamana aish karna aur mar jaana

haqiqi ishq tha jis ne rakha tariKH mein zinda

kisi ka do pahaDon par idhar jaana udhar jaana

tumhaari muntazir rahti hain buDhi shaKHen shiddat se

parinde der se mat sham ko su-e-shajar jaana

mohabbat karne walon ke bhi kya andaz hote hain

kabhi aandhi se laD jaana kabhi aahaT se Dar jaana

wahan bachchon ke chehre dekh kar kuchh yaad aaega

hamare ghar jala kar tum ko bhi hai apne ghar jaana

paDho pahle 'nabil' ek umr phir thamo qalam apna

zaruri hai chhalakne ke liye andar se bhar jaana