teri ek baat pe yun dil se tarane nikle

terī ik baat pe yuuñ dil se tarāne nikle

jaise ummīd ke jugnū ke Thikāne nikle

kyā huā terā karam jo na huā gar mujh pe

merī ulfat ke gharauñde se ḳhazāne nikle

itnā āsāñ na thā un se mirā duurī rakhnā

kis tarah azm ko ham apne nibhāne nikle

ham ne jaanā thā mohabbat kā sila hogā ġham

phir bhī kyā soch ke ham umr gañvāne nikle

un ke aane kī ho aahaT to mujhe lagtā hai

merī tanhā.ī sarāboñ se sajāne nikle

jab bhī ehsās-e-masarrat huā ik pal ko tabhī

niiñd se dard ko mere vo jagāne nikle

jo na kahnā thā kabhī aaj vo ash.ār banā.eñ

phir ye ma.azūr ġhazal sab ko sunāne nikle

tum se jo ho na sakā ham bhī kahāñ the māhir

ishq kī raah pe nākām siyāne nikle

vāsta itnā hī rahtā hai 'sabā' un se ye

chashm-e-pur-nam ko sitāroñ se sajāne nikle

teri ek baat pe yun dil se tarane nikle

jaise ummid ke jugnu ke Thikane nikle

kya hua tera karam jo na hua gar mujh pe

meri ulfat ke gharaunde se KHazane nikle

itna aasan na tha un se mera duri rakhna

kis tarah azm ko hum apne nibhane nikle

hum ne jaana tha mohabbat ka sila hoga gham

phir bhi kya soch ke hum umr ganwane nikle

un ke aane ki ho aahaT to mujhe lagta hai

meri tanhai sarabon se sajaane nikle

jab bhi ehsas-e-masarrat hua ek pal ko tabhi

nind se dard ko mere wo jagane nikle

jo na kahna tha kabhi aaj wo ashaar banaen

phir ye mazur ghazal sab ko sunane nikle

tum se jo ho na saka hum bhi kahan the mahir

ishq ki rah pe nakaam siyane nikle

wasta itna hi rahta hai 'saba' un se ye

chashm-e-pur-nam ko sitaron se sajaane nikle