teri jagah udas tera yar karta hai

terī jagah udaas tirā yaar kartā hai

bargad kā kaam sāya-e-dīvār kartā hai

milne se pahle koī vasīla talāsh kar

paanī pe chal ke kaun nadī paar kartā hai

Thahrāv dil kī tarah kisī haath meñ nahīñ

vo vaar bhī kare to lagātār kartā hai

kyā ho jo chaar bol mohabbat ke bol do

itnā to har marīz kā ġham-ḳhvār kartā hai

hoñToñ pe jam chukī haiñ namak kī ka.ī taheñ

sahrā hai aur pyaas kā iz.hār kartā hai

daldal kā phuul kaise kisī baaġh meñ khile

tū bosa de ke mujh ko gunahgār kartā hai

kul kī tamām ḳhūbiyāñ hotī haiñ juzv meñ

angāra aag kī tarah takrār kartā hai

jis ko bhī koī shak ho in āñkhoñ se pūchh le

sailāb to zamīn ko hamvār kartā hai

āb-o-havā-e-dahr kī be-raunaqī to dekh

duniyā se baḌh ke kyā tujhe bezār kartā hai

patthar na ho to shīshe kī kyā ahmiyat rahe

merā nahīñ tū apnā bhī inkār kartā hai

teri jagah udas tera yar karta hai

bargad ka kaam saya-e-diwar karta hai

milne se pahle koi wasila talash kar

pani pe chal ke kaun nadi par karta hai

Thahraw dil ki tarah kisi hath mein nahin

wo war bhi kare to lagatar karta hai

kya ho jo chaar bol mohabbat ke bol do

itna to har mariz ka gham-KHwar karta hai

honTon pe jam chuki hain namak ki kai tahen

sahra hai aur pyas ka izhaar karta hai

daldal ka phul kaise kisi bagh mein khile

tu bosa de ke mujh ko gunahgar karta hai

kul ki tamam KHubiyan hoti hain juzw mein

angara aag ki tarah takrar karta hai

jis ko bhi koi shak ho in aankhon se puchh le

sailab to zamin ko hamwar karta hai

aab-o-hawa-e-dahr ki be-raunaqi to dekh

duniya se baDh ke kya tujhe bezar karta hai

patthar na ho to shishe ki kya ahmiyat rahe

mera nahin tu apna bhi inkar karta hai