teri KHushiyon ki KHatir main kitni mehnat karta hun

terī ḳhushiyoñ kī ḳhātir maiñ kitnī mehnat kartā huuñ

ḳhvāboñ ko dīvāreñ aur tā'bīroñ ko chhat kartā huuñ

hijr ke dukh ko sukh karnā mushkil hī kyā nā-mumkin hai

lekin maiñ is zahr ko āsānī se sharbat kartā huuñ

pahle to maiñ sab se ziyāda ḳhud se mohabbat kartā thā

lekin ab maiñ sab se ziyāda ḳhud se nafrat kartā huuñ

merī majbūrī par shāyad majbūrī bhī chīḳh paḌe

maiñ bad-qismat dast-e-tanhā.ī par bai'at kartā huuñ

kitnī sanjīda-nazarī se dekh rahe haiñ ḳhār-o-gul

maiñ kamre ke ā.īnoñ kī yuuñ bhī 'izzat kartā huuñ

duniyā kī fitrat hai juute khā kar 'izzat kartī hai

maiñ Thahrā phir ḳhādim banda DaT kar ḳhidmat kartā huuñ

kaise kisī ohde par pahuñchūñ kaise gagan kā chāñd banūñ

na maiñ siyāsat sah paatā huuñ na maiñ siyāsat kartā huuñ

teri KHushiyon ki KHatir main kitni mehnat karta hun

KHwabon ko diwaren aur ta'biron ko chhat karta hun

hijr ke dukh ko sukh karna mushkil hi kya na-mumkin hai

lekin main is zahr ko aasani se sharbat karta hun

pahle to main sab se ziyaada KHud se mohabbat karta tha

lekin ab main sab se ziyaada KHud se nafrat karta hun

meri majburi par shayad majburi bhi chiKH paDe

main bad-qismat dast-e-tanhai par bai'at karta hun

kitni sanjida-nazari se dekh rahe hain KHar-o-gul

main kamre ke aainon ki yun bhi 'izzat karta hun

duniya ki fitrat hai jute kha kar 'izzat karti hai

main Thahra phir KHadim banda DaT kar KHidmat karta hun

kaise kisi ohde par pahunchun kaise gagan ka chand banun

na main siyasat sah pata hun na main siyasat karta hun