teri mahfil mein raushni na hui

terī mahfil meñ raushnī na huī

aaj bhī duur tīrgī na huī

zindagī se to maut behtar hai

aise jiine meñ zindagī na huī

dūsrī dāstāñ sunāte kyā

pahlī rūdād ḳhatm hī na huī

ek aur zindagī hai maut ke baad

ya.anī ye ziist aarzī na huī

chāhiye dostī ko rang-e-vafā

āshnā.ī hī dostī na huī

ham to insān-dost haiñ aise

koī sūrat bhī ajnabī na huī

ham ne ġham bhar liye haiñ dāman meñ

jab mayassar koī ḳhushī na huī

kyā 'kalīm' intizār-e-subh-e-hasīñ

log kahte haiñ shaam hī na huī

teri mahfil mein raushni na hui

aaj bhi dur tirgi na hui

zindagi se to maut behtar hai

aise jine mein zindagi na hui

dusri dastan sunate kya

pahli rudad KHatm hi na hui

ek aur zindagi hai maut ke baad

yani ye zist aarzi na hui

chahiye dosti ko rang-e-wafa

aashnai hi dosti na hui

hum to insan-dost hain aise

koi surat bhi ajnabi na hui

hum ne gham bhar liye hain daman mein

jab mayassar koi KHushi na hui

kya 'kalim' intizar-e-subh-e-hasin

log kahte hain sham hi na hui