teri mohabbaton ka talabgar main bhi hun

terī mohabbatoñ kā talabgār maiñ bhī huuñ

īsār kā vafā kā parastār maiñ bhī huuñ

mar.ūb maiñ nahīñ tirī ūñchī uḌaan se

mauj-e-havā se barsar-e-paikār maiñ bhī huuñ

hirs-o-havas kā daur hai majbūr haiñ avaam

rishvat adā.egī kā gunahgār maiñ bhī huuñ

dariyā-dilī kā terī ishāra milā to hai

lekin rahe ḳhayāl ki ḳhuddār maiñ bhī huuñ

maiñ kyoñ kisī kī zaat pe kīchaḌ uchhāl duuñ

ye jāntā huuñ sāhab-e-dastār maiñ bhī huuñ

har ik nigāh-e-ḳhās ne samjhā mujhe aziiz

haañ mohtaram badaulat-e-kirdār maiñ bhī huuñ

hai ik bikā.ū jins-e-siyāsat meñ ab zamīr

tum bhī lagāo daam ḳharīdār maiñ bhī huuñ

khoTe khare kā farq samajhtā huuñ maiñ huzūr

is daur ke mizāj kā fankār maiñ bhī huuñ

kam-zarf ne kalaf kā pahan kar libās kyoñ

da.avā kiyā ki raunaq-e-bāzār maiñ bhī huuñ

'nayyar' ta.alluqāt haiñ aarī ḳhulūs se

ahbāb ke sulūk se bezār maiñ bhī huuñ

teri mohabbaton ka talabgar main bhi hun

isar ka wafa ka parastar main bhi hun

marub main nahin teri unchi uDan se

mauj-e-hawa se barsar-e-paikar main bhi hun

hirs-o-hawas ka daur hai majbur hain awam

rishwat adaegi ka gunahgar main bhi hun

dariya-dili ka teri ishaara mila to hai

lekin rahe KHayal ki KHuddar main bhi hun

main kyon kisi ki zat pe kichaD uchhaal dun

ye jaanta hun sahab-e-dastar main bhi hun

har ek nigah-e-KHas ne samjha mujhe aziz

han mohtaram badaulat-e-kirdar main bhi hun

hai ek bikau jins-e-siyasat mein ab zamir

tum bhi lagao dam KHaridar main bhi hun

khoTe khare ka farq samajhta hun main huzur

is daur ke mizaj ka fankar main bhi hun

kam-zarf ne kalaf ka pahan kar libas kyon

dawa kiya ki raunaq-e-bazar main bhi hun

'nayyar' talluqat hain aari KHulus se

ahbab ke suluk se bezar main bhi hun