teri pazeb ne kya nind mein sansen li hain

terī pāzeb ne kyā niiñd meñ sāñseñ lī haiñ

maiñ ne kis reshmī jhankār se bāteñ kī haiñ

jagmagāte hue mahtāb se kirneñ le kar

baat ke zaḳhm nahīñ zaḳhm kī rāteñ sī haiñ

apne hī sāmne lagtā hai banā ho ye jahāñ

aaj ik pal meñ ka.ī yug ka.ī sadiyāñ jī haiñ

ab nahīñ hotā kisī saañp ke kaaTe kā asar

'ishq meñ zahr kī ham ne ka.ī nadiyāñ pī haiñ

mehrbānī kī koī ek nazar ham par bhī

chāhne vāloñ meñ tere mirī jaañ ham bhī haiñ

jis ne ik baar havas se nahīñ dekhā tujh ko

vo gunahgār koī aur nahīñ ham hī haiñ

teri pazeb ne kya nind mein sansen li hain

main ne kis reshmi jhankar se baaten ki hain

jagmagate hue mahtab se kirnen le kar

baat ke zaKHm nahin zaKHm ki raaten si hain

apne hi samne lagta hai bana ho ye jahan

aaj ek pal mein kai yug kai sadiyan ji hain

ab nahin hota kisi sanp ke kaTe ka asar

'ishq mein zahr ki hum ne kai nadiyan pi hain

mehrbani ki koi ek nazar hum par bhi

chahne walon mein tere meri jaan hum bhi hain

jis ne ek bar hawas se nahin dekha tujh ko

wo gunahgar koi aur nahin hum hi hain