teri surat se nahin tujhse mohabbat hui hai

terī sūrat se nahīñ tujh se mohabbat huī hai

shiddat-e-zabt meñ jo hālat-e-vahshat huī hai

mere atrāf meñ jo phuul khile haiñ mire dost

tere hone se hī to in meñ ye rangat huī hai

arsa-e-hijr meñ ai TuuT ke rone vaale

is se pahle bhī kabhī terī ye hālat huī hai

pyaas itnī hai ki halkān huā jaatā huuñ

mujh ko tujh se nahīñ dariyā se shikāyat huī hai

shahr kā shahr jo galiyoñ meñ umaD aaya thā

aise lagtā thā yahāñ koī baġhāvat huī hai

dil dhaḌakne kā sabab pūchh rahe ho to suno

terī aamad hī mujhe vaj.h-e-masarrat huī hai

maiñ ḳhudā kī tarah 'shahzād' use chāhtā huuñ

is liye merī mohabbat bhī ibādat huī hai

teri surat se nahin tujh se mohabbat hui hai

shiddat-e-zabt mein jo haalat-e-wahshat hui hai

mere atraf mein jo phul khile hain mere dost

tere hone se hi to in mein ye rangat hui hai

arsa-e-hijr mein ai TuT ke rone wale

is se pahle bhi kabhi teri ye haalat hui hai

pyas itni hai ki halkan hua jata hun

mujh ko tujh se nahin dariya se shikayat hui hai

shahr ka shahr jo galiyon mein umaD aaya tha

aise lagta tha yahan koi baghawat hui hai

dil dhaDakne ka sabab puchh rahe ho to suno

teri aamad hi mujhe wajh-e-masarrat hui hai

main KHuda ki tarah 'shahzad' use chahta hun

is liye meri mohabbat bhi ibaadat hui hai