teri taKHliq tera rang hawala tha mera

terī taḳhlīq tirā rañg havāla thā mirā

kaun kahtā hai ki andāz nirālā thā mirā

maiñ jahāñ par thā vahīñ tū thā mire ā.īna-gar

terī tasvīroñ se bharpūr risāla thā mirā

chāhtā thā maiñ duā māñgtā par kyā kartā

mere hāthoñ meñ to labrez piyāla thā mirā

mujhe pahle ka.ī sadiyoñ kī sazā kāTnā thī

manzil-e-sub.h se kuchh duur ujālā thā mirā

maiñ use bhuul gayā taaki use yaad na aa.uuñ

kitnā mahbūb mujhe bhūlne vaalā thā mirā

huuñ tahī-dast magar minnat-e-kashkol nahīñ

mohr-e-taskīn mujhe haath kā chhālā thā mirā

zahr piite hue ḳhāmosh hī rahnā thā mujhe

shāḳh-e-taslīm se gul-posh piyāla thā mirā

dūsrī zindagī dene kī zarūrat hī na thī

har na.ī shakl kī sūrat meñ izāla thā mirā

ye jo duniyā meñ sar-e-mauj-e-havā likkhā hai

mere yāroñ ne kabhī naam uchhālā thā mirā

teri taKHliq tera rang hawala tha mera

kaun kahta hai ki andaz nirala tha mera

main jahan par tha wahin tu tha mere aaina-gar

teri taswiron se bharpur risala tha mera

chahta tha main dua mangta par kya karta

mere hathon mein to labrez piyala tha mera

mujhe pahle kai sadiyon ki saza kaTna thi

manzil-e-subh se kuchh dur ujala tha mera

main use bhul gaya taki use yaad na aaun

kitna mahbub mujhe bhulne wala tha mera

hun tahi-dast magar minnat-e-kashkol nahin

mohr-e-taskin mujhe hath ka chhaala tha mera

zahr pite hue KHamosh hi rahna tha mujhe

shaKH-e-taslim se gul-posh piyala tha mera

dusri zindagi dene ki zarurat hi na thi

har nai shakl ki surat mein izala tha mera

ye jo duniya mein sar-e-mauj-e-hawa likkha hai

mere yaron ne kabhi nam uchhaala tha mera