teri talab mein aise giraftar ho gae

terī talab meñ aise giraftār ho ga.e

ham log ḳhud bhī raunaq-e-bāzār ho ga.e

kyā ḳhvāb thā ki kuchh nahīñ Thahrā nigāh meñ

kyā aks thā ki naqsh-ba-dīvār ho ga.e

hadd-e-nazar bichhā thā tirī diid kā samāñ

jo rāste the sahl vo dushvār ho ga.e

un ko bhī apne naam kī hurmat aziiz thī

jo terā saath dene pe tayyār ho ga.e

biphrā huā badan kisī qātil se kam na thā

ham bhī vufūr-e-shauq meñ talvār ho ga.e

go apne paas ek nazar ke sivā na thā

ham har but-e-hasīñ ke ḳharīdār ho ga.e

ye shahr zalzaloñ ke thapeḌoñ se hil gayā

kyā kyā ajab mahal the ki mismār ho ga.e

ḳhvāhish kī uljhanoñ pe koī bas na chal sakā

da.ave fusūn-e-yār ke be-kār ho ga.e

teri talab mein aise giraftar ho gae

hum log KHud bhi raunaq-e-bazar ho gae

kya KHwab tha ki kuchh nahin Thahra nigah mein

kya aks tha ki naqsh-ba-diwar ho gae

hadd-e-nazar bichha tha teri did ka saman

jo raste the sahl wo dushwar ho gae

un ko bhi apne nam ki hurmat aziz thi

jo tera sath dene pe tayyar ho gae

biphra hua badan kisi qatil se kam na tha

hum bhi wufur-e-shauq mein talwar ho gae

go apne pas ek nazar ke siwa na tha

hum har but-e-hasin ke KHaridar ho gae

ye shahr zalzalon ke thapeDon se hil gaya

kya kya ajab mahal the ki mismar ho gae

KHwahish ki uljhanon pe koi bas na chal saka

dawe fusun-e-yar ke be-kar ho gae