teri tarah malal mujhe bhi nahin raha

terī tarah malāl mujhe bhī nahīñ rahā

jā ab tirā ḳhayāl mujhe bhī nahīñ rahā

tū ne bhī mausamoñ kī pazīrā.ī chhoḌ dī

ab shauq-e-māh-o-sāl mujhe bhī nahīñ rahā

merā javāb kyā thā tujhe bhī ḳhabar nahīñ

yaad ab tirā savāl mujhe bhī nahīñ rahā

jis baat kā ḳhayāl na tū ne kabhī kiyā

is baat kā ḳhayāl mujhe bhī nahīñ rahā

toḌā hai tū ne jab se mire dil kā aa.ina

andāza-e-jamāl mujhe bhī nahīñ rahā

'bāqī' meñ apne fan se baḌā pur-ḳhulūs huuñ

is vāste zavāl mujhe bhī nahīñ rahā

teri tarah malal mujhe bhi nahin raha

ja ab tera KHayal mujhe bhi nahin raha

tu ne bhi mausamon ki pazirai chhoD di

ab shauq-e-mah-o-sal mujhe bhi nahin raha

mera jawab kya tha tujhe bhi KHabar nahin

yaad ab tera sawal mujhe bhi nahin raha

jis baat ka KHayal na tu ne kabhi kiya

is baat ka KHayal mujhe bhi nahin raha

toDa hai tu ne jab se mere dil ka aaina

andaza-e-jamal mujhe bhi nahin raha

'baqi' mein apne fan se baDa pur-KHulus hun

is waste zawal mujhe bhi nahin raha