teri tauqir baDhe aur meri izzat kam ho

terī tauqīr baḌhe aur mirī 'izzat kam ho

kuchh to aisā ho ki duniyā kī ye vahshat kam ho

log nikle to haiñ manzil kī talab meñ ghar se

raah bhī aisī chuneñ jis meñ sa'ūbat kam ho

vo 'ajab shahr hai jis meñ nahīñ giryāñ koī

vo 'ajab shahr hai jis shahr se hijrat kam ho

ab se pahle to yahāñ kī na thī aisī hālat

jaan jis kī chalī jaa.e use hairat kam ho

aaj maiñ ne tirī shamshīr qarīñ se dekhī

ab kahīñ merā taqāzā-e-shahādat kam ho

maiñ na.ī baat kahūñ aur na.e tevar se

merī tanqīd ziyāda ho vakālat kam ho

teri tauqir baDhe aur meri 'izzat kam ho

kuchh to aisa ho ki duniya ki ye wahshat kam ho

log nikle to hain manzil ki talab mein ghar se

rah bhi aisi chunen jis mein sa'ubat kam ho

wo 'ajab shahr hai jis mein nahin giryan koi

wo 'ajab shahr hai jis shahr se hijrat kam ho

ab se pahle to yahan ki na thi aisi haalat

jaan jis ki chali jae use hairat kam ho

aaj main ne teri shamshir qarin se dekhi

ab kahin mera taqaza-e-shahadat kam ho

main nai baat kahun aur nae tewar se

meri tanqid ziyaada ho wakalat kam ho