teri wafa ka hum ko guman is qadar hua

terī vafā kā ham ko gumāñ is qadar huā

aayā nazar na kuchh bhī dhuāñ is qadar huā

mil kar bhī ham to mil nahīñ paa.e kisī tarah

duniyā kā zulm ham pe javāñ is qadar huā

ghabrā ke dushmanoñ ko gale se lagā liyā

apne hī dostoñ se ziyāñ is qadar huā

ab to bhañvar meñ Duub ke rahnā hai har taraf

sāhil se duur apnā nishāñ is qadar huā

logoñ se ab to koī bhī shikva nahīñ hameñ

jab ye falak hī dushman-e-jāñ is qadar huā

phir ho sakī na merī munazzam ye zindagī

tujh se bichhaḌ ke sail ravāñ is qadar huā

sahrā meñ bah chukī haiñ ye āñkhoñ kī naddiyāñ

dil se kamāl-e-āh-o-fuġhāñ is qadar huā

dushman nahīñ vo apne hī the raaz khul gayā

raushan fasād meñ ye makāñ is qadar huā

allāh rakkhe fan ko mirī bad-nazar se duur

varna ye likhnā mujh pe girāñ is qadar huā

teri wafa ka hum ko guman is qadar hua

aaya nazar na kuchh bhi dhuan is qadar hua

mil kar bhi hum to mil nahin pae kisi tarah

duniya ka zulm hum pe jawan is qadar hua

ghabra ke dushmanon ko gale se laga liya

apne hi doston se ziyan is qadar hua

ab to bhanwar mein Dub ke rahna hai har taraf

sahil se dur apna nishan is qadar hua

logon se ab to koi bhi shikwa nahin hamein

jab ye falak hi dushman-e-jaan is qadar hua

phir ho saki na meri munazzam ye zindagi

tujh se bichhaD ke sail rawan is qadar hua

sahra mein bah chuki hain ye aankhon ki naddiyan

dil se kamal-e-ah-o-fughan is qadar hua

dushman nahin wo apne hi the raaz khul gaya

raushan fasad mein ye makan is qadar hua

allah rakkhe fan ko meri bad-nazar se dur

warna ye likhna mujh pe giran is qadar hua