tez aandhi the bagula the saba the hum bhi

tez āñdhī the bagūla the sabā the ham bhī

apnī auqāt se har chand sivā the ham bhī

Dhal gayā umr kā sūraj to ye ehsās huā

chaar din ke liye kyā jāniye kyā the ham bhī

laġhzisheñ ham se bhī kyā kyā na bahar-gām huiiñ

pūchhiye ham se to pāband-e-vafā the ham bhī

aaj Thukrā.e hue sang kī sūrat hī sahī

kal larazte hue hoñToñ kī duā the ham bhī

ġham to ye hai na mile ham ko parakhne vaale

dahr meñ ā.ina-e-sidq-o-safā the ham bhī

ho ga.e bas ki badaltī huī qadroñ ke shikār

apne aslāf ke naqsh-e-kaf-e-pā the ham bhī

ham ne chhoḌā na kahāñ apnā asar ai 'afzal'

nāla-e-sub.h the yā āh-e-rasā the ham bhī

tez aandhi the bagula the saba the hum bhi

apni auqat se har chand siwa the hum bhi

Dhal gaya umr ka suraj to ye ehsas hua

chaar din ke liye kya jaaniye kya the hum bhi

laghzishen hum se bhi kya kya na bahar-gam huin

puchhiye hum se to paband-e-wafa the hum bhi

aaj Thukrae hue sang ki surat hi sahi

kal larazte hue honTon ki dua the hum bhi

gham to ye hai na mile hum ko parakhne wale

dahr mein aaina-e-sidq-o-safa the hum bhi

ho gae bas ki badalti hui qadron ke shikar

apne aslaf ke naqsh-e-kaf-e-pa the hum bhi

hum ne chhoDa na kahan apna asar ai 'afzal'

nala-e-subh the ya aah-e-rasa the hum bhi