tez-tar lahja-e-guftar kiya hai humne

tez-tar lahja-e-guftār kiyā hai ham ne

barg-e-gul ko kabhī talvār kiyā hai ham ne

sho.la-e-teġh ko āġhosh-e-nazar meñ le kar

ziist meñ maut ko bhī pyaar kiyā hai ham ne

kitne mansūroñ kā ḳhuuñ de ke tire kūche meñ

ehtirām-e-rasan-o-dār kiyā hai ham ne

mai-kade vāloñ ko saaqī kā havāla de kar

ek āvāz pe hushiyār kiyā hai ham ne

ġhair ke ḳhaam irādoñ ko kiyā hai paspā

azm ko āhanī dīvār kiyā hai ham ne

amn kahte haiñ jise ruuh hai āzādī kī

ek aalam ko ḳhabar-dār kiyā hai ham ne

ġhair ko pahle hī pahchān liyā thā lekin

hosh meñ aane ko ik vaar kiyā hai ham ne

ḳhuun ke daaġh chaTānoñ pe jo paa.e haiñ 'nushūr'

chuum kar lāla-e-kuhsār kiyā hai ham ne

tez-tar lahja-e-guftar kiya hai hum ne

barg-e-gul ko kabhi talwar kiya hai hum ne

shola-e-tegh ko aaghosh-e-nazar mein le kar

zist mein maut ko bhi pyar kiya hai hum ne

kitne mansuron ka KHun de ke tere kuche mein

ehtiram-e-rasan-o-dar kiya hai hum ne

mai-kade walon ko saqi ka hawala de kar

ek aawaz pe hushiyar kiya hai hum ne

ghair ke KHam iradon ko kiya hai paspa

azm ko aahani diwar kiya hai hum ne

amn kahte hain jise ruh hai aazadi ki

ek aalam ko KHabar-dar kiya hai hum ne

ghair ko pahle hi pahchan liya tha lekin

hosh mein aane ko ek war kiya hai hum ne

KHun ke dagh chaTanon pe jo pae hain 'nushur'

chum kar lala-e-kuhsar kiya hai hum ne