tha dam-e-parwaz jaane kaise manzar ka KHayal

thā dam-e-parvāz jaane kaise manzar kā ḳhayāl

tā.ir-e-dil ne na rakkhā baal aur par kā ḳhayāl

phir kahāñ mumkin rasā.ī manzil-e-maqsūd tak

ho safar kā shauq lekin dil meñ ho ghar kā ḳhayāl

yuuñ junūñ ko justujū-e-ālam-e-idrāk hai

jaise qatre kī nazar meñ ho samundar kā ḳhayāl

hai mire pesh-e-nazar jab dasht-e-īsār-o-vafā

kis ko fursat hai ki rakkhe jism kā sar kā ḳhayāl

fikr ke motī bikhere jā rahā huuñ roz-o-shab

jaane kis markaz pe Thahrā zindagī bhar kā ḳhayāl

jān-o-dil ko soz-e-ġham kī de gayā ra.anā.iyāñ

jab use aaya hai mere dīda-e-tar kā ḳhayāl

ai 'qamar' ye hai dalīl-e-azmat-e-fikr-o-shu.ūr

paañv phailāne se pahle jab ho chādar kā ḳhayāl

tha dam-e-parwaz jaane kaise manzar ka KHayal

tair-e-dil ne na rakkha baal aur par ka KHayal

phir kahan mumkin rasai manzil-e-maqsud tak

ho safar ka shauq lekin dil mein ho ghar ka KHayal

yun junun ko justuju-e-alam-e-idrak hai

jaise qatre ki nazar mein ho samundar ka KHayal

hai mere pesh-e-nazar jab dasht-e-isar-o-wafa

kis ko fursat hai ki rakkhe jism ka sar ka KHayal

fikr ke moti bikhere ja raha hun roz-o-shab

jaane kis markaz pe Thahra zindagi bhar ka KHayal

jaan-o-dil ko soz-e-gham ki de gaya ranaiyan

jab use aaya hai mere dida-e-tar ka KHayal

ai 'qamar' ye hai dalil-e-azmat-e-fikr-o-shuur

panw phailane se pahle jab ho chadar ka KHayal