tha yaqin ka tazkira wahm-o-guman tak le gae

thā yaqīñ kā tazkira vahm-o-gumāñ tak le ga.e

baat niklī thī kahāñ kī tum kahāñ tak le ga.e

tum ga.e aur e.atibār-e-rāz-dāñ tak le ga.e

baat jo merī thī ġhairoñ kī zabāñ tak le ga.e

manzil-e-dār-o-rasan ke husn kā tālib thā maiñ

rāhbar mujh ko faqat kū-e-butāñ tak le ga.e

kyoñ kisī ko zahmat-e-bedād deñ ḳhuddār haiñ

aag ke sho.aloñ ko ham ḳhud āshiyāñ tak le ga.e

sarfaroshī ne baḌhā dī aur bhī kuchh aabrū

log dāman kī hamāre dhajjiyāñ tak le ga.e

faisle dete rahe ātish-bayānī ke ḳhilāf

mas.ala jab koī ham ahl-e-zabāñ tak le ga.e

aa.e jab jhoñke havāoñ ke to maqtal meñ 'azīz'

garmiyāñ mere laboñ kī gulsitāñ tak le ga.e

tha yaqin ka tazkira wahm-o-guman tak le gae

baat nikli thi kahan ki tum kahan tak le gae

tum gae aur eatibar-e-raaz-dan tak le gae

baat jo meri thi ghairon ki zaban tak le gae

manzil-e-dar-o-rasan ke husn ka talib tha main

rahbar mujh ko faqat ku-e-butan tak le gae

kyon kisi ko zahmat-e-bedad den KHuddar hain

aag ke shoalon ko hum KHud aashiyan tak le gae

sarfaroshi ne baDha di aur bhi kuchh aabru

log daman ki hamare dhajjiyan tak le gae

faisle dete rahe aatish-bayani ke KHilaf

masala jab koi hum ahl-e-zaban tak le gae

aae jab jhonke hawaon ke to maqtal mein 'aziz'

garmiyan mere labon ki gulsitan tak le gae