tha zindagi se pyar to bimar kyon hue

thā zindagī se pyaar to bīmār kyoñ hue

ya.anī asīr-e-gesū-e-dil-dār kyoñ hue

vīrāniyoñ kā aur bhī ehsās baḌh gayā

nazroñ ke sāmne gul-o-gulzār kyoñ hue

kholeñ ye raaz ab tirī zulfoñ ke pech-o-ḳham

ham kāvish-e-junūñ meñ giraftār kyoñ hue

bebākī-e-nigāh ke mujrim haiñ ham magar

jalve harīf-e-lazzat-e-dīdār kyoñ hue

minnat-pazīr shāna-e-tadbīr ke jo haiñ

taqdīr ke vo gesū-e-ḳhamdār kyoñ hue

mauj-e-havā-e-shauq ne ham ko kiyā ḳharāb

jiine se kyā batā.eñ ki bezār kyoñ hue

ehsās-e-talḳhī-e-ġham-o-ālām al-amāñ

dīvāna kyoñ na ham hue hushiyār kyoñ hue

kuchh aur baḌh ga.ī hai girāñ-bārī-e-hayāt

sharminda-e-navāzish-e-aġhyār kyoñ hue

pādāsh-e-jurm meñ jise denā paḌā hai dil

us kī nazar ke aap gunahgār kyoñ hue

har har nafas hai ab to sazā-e-dil-o-nazar

itnā mire qarīb ye afkār kyoñ hue

apne ko dekh aur phir apnī nazar ko dekh

ham se na pūchh be-ḳhud-o-sarshār kyoñ hue

'nāsir' vo zindagī vo laḌakpan kī zindagī

ham us hasīn ḳhvāb se bedār kyoñ hue

tha zindagi se pyar to bimar kyon hue

yani asir-e-gesu-e-dil-dar kyon hue

viraniyon ka aur bhi ehsas baDh gaya

nazron ke samne gul-o-gulzar kyon hue

kholen ye raaz ab teri zulfon ke pech-o-KHam

hum kawish-e-junun mein giraftar kyon hue

bebaki-e-nigah ke mujrim hain hum magar

jalwe harif-e-lazzat-e-didar kyon hue

minnat-pazir shana-e-tadbir ke jo hain

taqdir ke wo gesu-e-KHamdar kyon hue

mauj-e-hawa-e-shauq ne hum ko kiya KHarab

jine se kya bataen ki bezar kyon hue

ehsas-e-talKHi-e-gham-o-alam al-aman

diwana kyon na hum hue hushiyar kyon hue

kuchh aur baDh gai hai giran-bari-e-hayat

sharminda-e-nawazish-e-aghyar kyon hue

padash-e-jurm mein jise dena paDa hai dil

us ki nazar ke aap gunahgar kyon hue

har har nafas hai ab to saza-e-dil-o-nazar

itna mere qarib ye afkar kyon hue

apne ko dekh aur phir apni nazar ko dekh

hum se na puchh be-KHud-o-sarshaar kyon hue

'nasir' wo zindagi wo laDakpan ki zindagi

hum us hasin KHwab se bedar kyon hue