Thahar ke chhat pe hawaon ko rok rakkha hai

Thahar ke chhat pe havāoñ ko rok rakkhā hai

ye kis ne chāñd sitāroñ ko rok rakkhā hai

bhalī nahīñ hai ye duniyā pa terī āñkhoñ ne

ham aise jaane hī kitnoñ ko rok rakkhā hai

lipaT to jaa.eñ ye jaate hue parindoñ se

magar anā ne daraḳhtoñ ko rok rakkhā hai

zarā sā ro ye jabīñ chuum aur jaane de

tirī ḳhamoshī ne qadmoñ ko rok rakkhā hai

lagā hai ham ko milāne meñ jazb-e-'ishq magar

'ajīb ḳhauf ne donoñ ko rok rakkhā hai

agarche aa chukā hai kab se manzar-e-hijrat

hamīñ ne apnī in āñkhoñ ko rok rakkhā hai

bachā to kuchh bhī nahīñ in za'īf peḌoñ meñ

to kyā hai jis ne parindoñ ko rok rakkhā hai

Thahar ke chhat pe hawaon ko rok rakkha hai

ye kis ne chand sitaron ko rok rakkha hai

bhali nahin hai ye duniya pa teri aankhon ne

hum aise jaane hi kitnon ko rok rakkha hai

lipaT to jaen ye jate hue parindon se

magar ana ne daraKHton ko rok rakkha hai

zara sa ro ye jabin chum aur jaane de

teri KHamoshi ne qadmon ko rok rakkha hai

laga hai hum ko milane mein jazb-e-'ishq magar

'ajib KHauf ne donon ko rok rakkha hai

agarche aa chuka hai kab se manzar-e-hijrat

hamin ne apni in aankhon ko rok rakkha hai

bacha to kuchh bhi nahin in za'if peDon mein

to kya hai jis ne parindon ko rok rakkha hai