Thahra hua aankhon mein jo sailab-e-ziya tha

Thahrā huā āñkhoñ meñ jo sailāb-e-ziyā thā

ye pichhle pahar kaun thā tum the ki ḳhudā thā

muddat se to ab yaad bhī aatī nahīñ us kī

ye nuur sā lekin mire ġham-ḳhāne meñ kyā thā

maiñ aur tire sho’la-e-ruḳh ko karūñ badnām

kah dūñgā ki ye haath to vaise hī jalā thā

mātam hai dam-e-sub.h jo lahroñ kī zabāñ par

ye āḳhir-e-shab kaun samandar meñ girā thā

ab ahl-e-gulistāñ ko yaqīñ aa.e na aa.e

ik phuul to dāman meñ hamāre bhī khilā thā

hālāt ne tanhā mujhe is darja kiyā hai

bāvar nahīñ hotā ki kabhī tū bhī milā thā

palkoñ pe mahakte the idhar phuul lahū ke

ai 'nūr' udhar mashġhala-e-shauq-e-hinā thā

Thahra hua aankhon mein jo sailab-e-ziya tha

ye pichhle pahar kaun tha tum the ki KHuda tha

muddat se to ab yaad bhi aati nahin us ki

ye nur sa lekin mere gham-KHane mein kya tha

main aur tere sho’la-e-ruKH ko karun badnam

kah dunga ki ye hath to waise hi jala tha

matam hai dam-e-subh jo lahron ki zaban par

ye aaKHir-e-shab kaun samandar mein gira tha

ab ahl-e-gulistan ko yaqin aae na aae

ek phul to daman mein hamare bhi khila tha

haalat ne tanha mujhe is darja kiya hai

bawar nahin hota ki kabhi tu bhi mila tha

palkon pe mahakte the idhar phul lahu ke

ai 'nur' udhar mashghala-e-shauq-e-hina tha