thak thak gae hain aashiq darmanda-e-fughan ho

thak thak ga.e haiñ āshiq darmanda-e-fuġhāñ ho

yārab kahīñ vo ġhaflat fariyād-e-be-kasāñ ho

yā qahr hai vo shoḳhī yā parda hai nazar kā

dil meñ to us kā ghar ho aur aañkh se nihāñ ho

ye shor bhar rahā hai fariyād kā jahāñ meñ

jo baat lab pe aa.ī ulTī phirī fuġhāñ ho

kis kis duā ko māñgeñ kyā kyā havas nikāleñ

ik jaañ kidhar kidhar ho ik dil kahāñ kahāñ ho

bargasht-agī-e-qismat ye chheḌ kyā nikālī

jo mudda.ā-e-dil ho vo mudda.ī-e-jāñ ho

maqdūr tak to apne tujh se nibhā.eñge ham

be-jān-o-dil haiñ hāzir gar qasd-e-imtihāñ ho

sayyād maiñ nahīñ huuñ gum-karda āshiyāñ huuñ

ai ham-safīro bolo kis jā ho aur kahāñ ho

ai aah dil se uTh kar lab par hai kyā ta.amul

jā shorish-e-zamīñ ho āshob-e-āsmāñ ho

miT miT ke bhī hamārā ik ban rahegā sāmāñ

ujḌe agar bahārāñ ābādī-e-ḳhizāñ ho

jab baiThne pe aa.e ai zo.af baiTh rahiye

phir kyā hai ye takalluf us kā hī āstāñ ho

tū hī rahegī bulbul yā maiñ hī is chaman meñ

yā terā hī ho qissa yā merī dāstāñ ho

mere suḳhan meñ kyā hai kuchh ḳhāl-o-ḳhat bayāñ hai

par dil se us ke pūchhe jo koī nukta-dāñ ho

merā salām kahnā jhuk kar 'qalaq' vahī hai

us kī galī meñ baiThā mauzūñ sā jo javāñ ho

thak thak gae hain aashiq darmanda-e-fughan ho

yarab kahin wo ghaflat fariyaad-e-be-kasan ho

ya qahr hai wo shoKHi ya parda hai nazar ka

dil mein to us ka ghar ho aur aankh se nihan ho

ye shor bhar raha hai fariyaad ka jahan mein

jo baat lab pe aai ulTi phiri fughan ho

kis kis dua ko mangen kya kya hawas nikalen

ek jaan kidhar kidhar ho ek dil kahan kahan ho

bargasht-agi-e-qismat ye chheD kya nikali

jo muddaa-e-dil ho wo muddai-e-jaan ho

maqdur tak to apne tujh se nibhaenge hum

be-jaan-o-dil hain hazir gar qasd-e-imtihan ho

sayyaad main nahin hun gum-karda aashiyan hun

ai ham-safiro bolo kis ja ho aur kahan ho

ai aah dil se uTh kar lab par hai kya tamul

ja shorish-e-zamin ho aashob-e-asman ho

miT miT ke bhi hamara ek ban rahega saman

ujDe agar bahaaran aabaadi-e-KHizan ho

jab baiThne pe aae ai zoaf baiTh rahiye

phir kya hai ye takalluf us ka hi aastan ho

tu hi rahegi bulbul ya main hi is chaman mein

ya tera hi ho qissa ya meri dastan ho

mere suKHan mein kya hai kuchh KHal-o-KHat bayan hai

par dil se us ke puchhe jo koi nukta-dan ho

mera salam kahna jhuk kar 'qalaq' wahi hai

us ki gali mein baiTha mauzun sa jo jawan ho