thakan ke sath baDha halqa-e-nazar mera

thakan ke saath baḌhā halqa-e-nazar merā

huā na ḳhatm kisī moḌ par safar merā

ubuur kar luuñ abhī zindagī kā vīrāna

khaḌā huā hai magar rāste meñ Dar merā

bhaTak rahā huuñ maiñ hālāt ke añdheroñ meñ

chamak rahā hai tire āñsuoñ se ghar merā

milā jo qurb to raushan hue sabhī ḳhāke

taras rahā thā usī aag ko hunar merā

ḳhud apne aap ko samjhā ke lauT aayā huuñ

koī bhī bas na chalā jab hujūm par merā

vo shor thā na sunī apne jism kī āvāz

bulā rahā thā mujhe kab se ham-safar merā

maiñ ghar gayā huuñ makānoñ ke darmiyāñ 'rāshid'

paḌā nahīñ abhī saaya zamīn par merā

thakan ke sath baDha halqa-e-nazar mera

hua na KHatm kisi moD par safar mera

ubur kar lun abhi zindagi ka virana

khaDa hua hai magar raste mein Dar mera

bhaTak raha hun main haalat ke andheron mein

chamak raha hai tere aansuon se ghar mera

mila jo qurb to raushan hue sabhi KHake

taras raha tha usi aag ko hunar mera

KHud apne aap ko samjha ke lauT aaya hun

koi bhi bas na chala jab hujum par mera

wo shor tha na suni apne jism ki aawaz

bula raha tha mujhe kab se ham-safar mera

main ghar gaya hun makanon ke darmiyan 'rashid'

paDa nahin abhi saya zamin par mera