thakan se chur hun lekin rawan-dawan hun main

thakan se chuur huuñ lekin ravāñ-davāñ huuñ maiñ

na.ī sahar ke charāġhoñ kā kārvāñ huuñ maiñ

havā.eñ mere varaq lauT lauT detī haiñ

na jaane kitne zamānoñ kī dāstāñ huuñ maiñ

har ek shahr-e-nigārāñ samajh rahā hai mujhe

zarā qarīb se dekho dhuāñ dhuāñ huuñ maiñ

kisī se bhiiḌ meñ chehra badal gayā hai mirā

to saare ā.ina-ḳhānoñ se bad-gumāñ huuñ maiñ

maiñ apnī guuñj meñ khoī huuñ ek muddat se

mujhe ḳhabar nahīñ kuchh kaun huuñ kahāñ huuñ maiñ

ḳhud apnī diid se mahrūm hai nazar merī

azal se sūrat-e-nazzāra darmiyāñ huuñ maiñ

mirā vajūd-o-adam raaz hai hamesha se

vahāñ vahāñ bhī nahīñ huuñ jahāñ jahāñ huuñ maiñ

thakan se chur hun lekin rawan-dawan hun main

nai sahar ke charaghon ka karwan hun main

hawaen mere waraq lauT lauT deti hain

na jaane kitne zamanon ki dastan hun main

har ek shahr-e-nigaran samajh raha hai mujhe

zara qarib se dekho dhuan dhuan hun main

kisi se bhiD mein chehra badal gaya hai mera

to sare aaina-KHanon se bad-guman hun main

main apni gunj mein khoi hun ek muddat se

mujhe KHabar nahin kuchh kaun hun kahan hun main

KHud apni did se mahrum hai nazar meri

azal se surat-e-nazzara darmiyan hun main

mera wajud-o-adam raaz hai hamesha se

wahan wahan bhi nahin hun jahan jahan hun main