thakan se kuchh na kuchh main duri-e-manzil se kahti hun

thakan se kuchh na kuchh maiñ dūrī-e-manzil se kahtī huuñ

jo kuchh achchhā burā kahtī huuñ apne dil se kahtī huuñ

uThā kar husn kā parda dikhā do jalva-e-rangīñ

maiñ itnī baat bhī tum se baḌī mushkil se kahtī huuñ

thapeḌe par thapeḌe khā ke jab āñkheñ uThātī huuñ

ishāroñ meñ ḳhudā ma.alūm kyā sāhil se kahtī huuñ

taqāzā zabt-e-ġham kartā hai kyā kyā muskurāne kā

taḌapne ke liye maiñ zaḳhm ḳhurda dil se kahtī huuñ

bhayānak raat meñ ġham kī rah-e-ulfat kā afsāna

akele baiTh kar pahroñ ḳhud apne dil se kahtī huuñ

jo pāband-e-mohabbat haiñ ajal se Dar nahīñ sakte

mirī gardan pe ḳhanjar pher maiñ qātil se kahtī huuñ

na jaane kyoñ tarab bār-e-garāñ hotā hai majnūñ ko

agar maiñ baat koī lailā-e-mahmil se kahtī huuñ

thakan se kuchh na kuchh main duri-e-manzil se kahti hun

jo kuchh achchha bura kahti hun apne dil se kahti hun

uTha kar husn ka parda dikha do jalwa-e-rangin

main itni baat bhi tum se baDi mushkil se kahti hun

thapeDe par thapeDe kha ke jab aankhen uThati hun

ishaaron mein KHuda malum kya sahil se kahti hun

taqaza zabt-e-gham karta hai kya kya muskurane ka

taDapne ke liye main zaKHm KHurda dil se kahti hun

bhayanak raat mein gham ki rah-e-ulfat ka afsana

akele baiTh kar pahron KHud apne dil se kahti hun

jo paband-e-mohabbat hain ajal se Dar nahin sakte

meri gardan pe KHanjar pher main qatil se kahti hun

na jaane kyon tarab bar-e-garan hota hai majnun ko

agar main baat koi laila-e-mahmil se kahti hun