thake jismon thaki ruhon ke sab mani badalte hain

thake jismoñ thakī rūhoñ ke sab ma.anī badalte haiñ

visāl-e-hijr ke mausam meñ uryānī badalte haiñ

gharoñ meñ baiThe baiThe zañg lag jaatā hai jismoñ ko

chalo tālāb kā Thahrā huā paanī badalte haiñ

badaltī dekhī hai duniyā faqat āñkhoñ ne hī ab tak

chalo ik kaam karte haiñ ki hairānī badalte haiñ

baḌī mushkil se do misroñ meñ koī rabt bantā hai

kabhī uulā badalte haiñ kabhī saanī badalte haiñ

yaqīnan yuuñ nahīñ hotā magar ik bad-gumānī hai

koī ham se kahe aao pareshānī badalte haiñ

tumhārā zikr karte haiñ dar-o-dīvār se aksar

baḌī mushkil se ham is ghar kī vīrānī badalte haiñ

isī mausam meñ to lagtā hai pahra merī āñkhoñ par

yahī mausam to dariyāoñ kī tuġhyānī badalte haiñ

miyāñ 'vāhid' kisī din ballī-mārāñ ho ke aate haiñ

miyāñ naushā se mil kar ye pashemānī badalte haiñ

thake jismon thaki ruhon ke sab mani badalte hain

visal-e-hijr ke mausam mein uryani badalte hain

gharon mein baiThe baiThe zang lag jata hai jismon ko

chalo talab ka Thahra hua pani badalte hain

badalti dekhi hai duniya faqat aankhon ne hi ab tak

chalo ek kaam karte hain ki hairani badalte hain

baDi mushkil se do misron mein koi rabt banta hai

kabhi ula badalte hain kabhi sani badalte hain

yaqinan yun nahin hota magar ek bad-gumani hai

koi hum se kahe aao pareshani badalte hain

tumhaara zikr karte hain dar-o-diwar se aksar

baDi mushkil se hum is ghar ki virani badalte hain

isi mausam mein to lagta hai pahra meri aankhon par

yahi mausam to dariyaon ki tughyani badalte hain

miyan 'wahid' kisi din balli-maran ho ke aate hain

miyan nausha se mil kar ye pashemani badalte hain