the jo KHushbu wo hawa kya hote

the jo ḳhushbū vo havā kyā hote

barg-e-gul bād-e-sabā kyā hote

jaan dete rahe shohrat ke liye

log nāmoñ se rihā kyā hote

ham to ḳhud se bhī mushābah na hue

ham zamāne pe ravā kyā hote

rabt baḌhtā gayā mafhūm ke saath

harf se harf judā kyā hote

jin kī miTTī meñ na thī ḳhaak apnī

vo badan dast-e-duā kyā hote

saañs lete jo zamāne kī tarah

ham ajal se bhī qazā kyā hote

bādbāñ bhī na kabhī jin pe khule

vo samundar kī havā kyā hote

jin ko taḳhlīq kiyā maiñ ne 'samad'

vo sanam mere ḳhudā kyā hote

the jo KHushbu wo hawa kya hote

barg-e-gul baad-e-saba kya hote

jaan dete rahe shohrat ke liye

log namon se riha kya hote

hum to KHud se bhi mushabah na hue

hum zamane pe rawa kya hote

rabt baDhta gaya mafhum ke sath

harf se harf juda kya hote

jin ki miTTi mein na thi KHak apni

wo badan dast-e-dua kya hote

sans lete jo zamane ki tarah

hum ajal se bhi qaza kya hote

baadban bhi na kabhi jin pe khule

wo samundar ki hawa kya hote

jin ko taKHliq kiya main ne 'samad'

wo sanam mere KHuda kya hote