the sab ke aankh nak koi is mein shak na tha

the sab ke aañkh naak koī is meñ shak na thā

dekhā to itnī bhiiḌ meñ ik chehra tak na thā

yuuñ hai ki mere qatl ke darpe tamām umr

ḳhud maiñ thā aur ye mujhe ma.alūm tak na thā

bejā huā bajā huā jo kuchh huā huā

maḳhlūq vo falak kī na thī maiñ malak na thā

sadiyoñ kī zindagī meñ ulaT-pher ho ga.ī

aur lutf ye ki jeb meñ ik lamha tak na thā

jangal imāratoñ ke khaḌe the chahār-samt

DhūñDā to aadmī kā nishāñ duur tak na thā

shab thī to us ko chāñd kā jhūmar na thā nasīb

sūraj kā din ke māthe pe raushan tilak na thā

jumman miyāñ bhī the vahāñ panvāḌī-lāl bhī

'muztar' ġhazal sunāne kā ham ko hī haq na thā

the sab ke aankh nak koi is mein shak na tha

dekha to itni bhiD mein ek chehra tak na tha

yun hai ki mere qatl ke darpe tamam umr

KHud main tha aur ye mujhe malum tak na tha

beja hua baja hua jo kuchh hua hua

maKHluq wo falak ki na thi main malak na tha

sadiyon ki zindagi mein ulaT-pher ho gai

aur lutf ye ki jeb mein ek lamha tak na tha

jangal imaraton ke khaDe the chahaar-samt

DhunDa to aadmi ka nishan dur tak na tha

shab thi to us ko chand ka jhumar na tha nasib

suraj ka din ke mathe pe raushan tilak na tha

jumman miyan bhi the wahan panwaDi-lal bhi

'muztar' ghazal sunane ka hum ko hi haq na tha