Thik hai dil pe tere dard ka dhawa bhi hai

Thiik hai dil pe tire dard kā dhāvā bhī hai

par udāsī kā sabab is ke 'alāva bhī hai

ham jo lete haiñ sar-e-'ām balā.eñ terī

kuchh mohabbat hai magar kuchh ye dikhāvā bhī hai

ye jo har baat vo kartā nahīñ apnī mujh se

is kā matlab hai koī mere 'alāva bhī hai

koī batlā.e maiñ us shaḳhs ko chhoḌūñ kaise

jo mirā dukh hai mire dukh kā mudāvā bhī hai

chāñd vaise bhī nazar aatā hai ḳhush-bāsh sadā

aaj to ḳhair samundar kā bulāvā bhī hai

jis jagah tū hai koī aur nahīñ aa saktā

to samajh le ki ye vā'da bhī hai dā'vā bhī hai

raat āñkhoñ se bahā hai to jalā diiñ āñkheñ

maiñ samajhtā thā lahū hai ye to laavā bhī hai

Thik hai dil pe tere dard ka dhawa bhi hai

par udasi ka sabab is ke 'alawa bhi hai

hum jo lete hain sar-e-'am balaen teri

kuchh mohabbat hai magar kuchh ye dikhawa bhi hai

ye jo har baat wo karta nahin apni mujh se

is ka matlab hai koi mere 'alawa bhi hai

koi batlae main us shaKHs ko chhoDun kaise

jo mera dukh hai mere dukh ka mudawa bhi hai

chand waise bhi nazar aata hai KHush-bash sada

aaj to KHair samundar ka bulawa bhi hai

jis jagah tu hai koi aur nahin aa sakta

to samajh le ki ye wa'da bhi hai da'wa bhi hai

raat aankhon se baha hai to jala din aankhen

main samajhta tha lahu hai ye to lawa bhi hai