Thikana ho na ho phir bhi Thikana DhunD lete hain

Thikānā ho na ho phir bhī Thikānā DhūñD lete haiñ

qafas meñ rah ke bhī ham āshiyāna DhūñD lete haiñ

kitāb-e-dil meñ vo ġham ko chhupā leñge to kyā hogā

magar ham dard-o-ġham kā har ḳhazāna DhūñD lete haiñ

kabhī un ko sahāre kī zarūrat hī nahīñ paḌtī

parinde ḳhud-ba-ḳhud apnā Thikānā DhūñD lete haiñ

zamāne kī nazar meñ qatra-e-shabnam sahī lekin

kuchh aise haiñ jo ashkoñ meñ fasāna DhūñD lete haiñ

ġhizā hansoñ ko motī kī koī lā kar nahīñ detā

vo ḳhud sīpoñ ke andar apnā daana DhūñD lete haiñ

mirī tanhā.iyoñ kā zikr jab un tak nahīñ pahuñchā

to kis kī rahbarī se vo Thikānā DhūñD lete haiñ

jab un kā naam apnī ruuh meñ gudvā liyā 'svāmī'

to phir kyoñ tark-e-ulfat kā bahāna DhūñD lete haiñ

Thikana ho na ho phir bhi Thikana DhunD lete hain

qafas mein rah ke bhi hum aashiyana DhunD lete hain

kitab-e-dil mein wo gham ko chhupa lenge to kya hoga

magar hum dard-o-gham ka har KHazana DhunD lete hain

kabhi un ko sahaare ki zarurat hi nahin paDti

parinde KHud-ba-KHud apna Thikana DhunD lete hain

zamane ki nazar mein qatra-e-shabnam sahi lekin

kuchh aise hain jo ashkon mein fasana DhunD lete hain

ghiza hanson ko moti ki koi la kar nahin deta

wo KHud sipon ke andar apna dana DhunD lete hain

meri tanhaiyon ka zikr jab un tak nahin pahuncha

to kis ki rahbari se wo Thikana DhunD lete hain

jab un ka nam apni ruh mein gudwa liya 'swami'

to phir kyon tark-e-ulfat ka bahana DhunD lete hain